THE SIX TRIPLE EIGHT – WWII war movie

THE SIX TRIPLE EIGHT – WWII war movie

இரண்டாம் உலகப் போரில் அமெரிக்க இராணுவம் ஜெர்மனிக்கு எதிராக சண்டையிட்டுள்ளது தெரியும். அமெரிக்க கருப்பின பெண்களைக் கொண்ட படைப் பிரிவு ஒன்றும் உருவாக்கப் பட்டிருந்துள்ளது. அவர்களது இரண்டாம் உலகப் போர் பங்களிப்பை பற்றியது தான் இந்த சிக்ஸ் டிரிப்பில் எய்ட் படம். ஃபைட்டிங் டு ஃப்ரண்ட் வார் என்கிற செய்திக் கட்டுரையில் வந்த தகவலைத்தான் பத்தாப்பு பாடத்தில் வர ஹிண்ட்ஸ் டெவலப் மெண்ட் பண்ணி இஸ் வாஸ் தி எல்லாம் போட்டு இந்தப் படமாக கொண்டு வந்துள்ளார்கள். *ஸ்பாய்லர் அலர்ட்* பென்சில்வேனியாவில் உள்ள ஒரு சிறு நகரில் உள்ள கருப்பினப் பெண் லேனா ஆப்ராம் ஒரு யூத இனத்து இராணுவ வீரனைக் காதலிக்கிறாள். அவன் அவளிடம் ”காத்திரு ஒறவே” என்று கூறி போருக்குச் சென்றவன் வீரமரணம் அடைகிறான். லேனா ஒரு பலகீனமானவளாக இருந்தாலும் “ஏ நானுக்கும் போருக்கு வரேன்“ என்று வான்டனாக வண்டியில் ஏறிக் கொள்கிறாள். அங்கே அவர்களது நீக்ரோ இன பெண்கள் பட்டாலியன் சேரிட்டி ஆடம்ஸ் என்கிற “ஸ்ட்ரிக்ட் கேப்டன்“ ஆல் மிக கடுமையாக பயிற்றுவிக்கப் படுகிறார்கள். இதற்கிடையில் ரூஸ்வெல்ட் வீட்டிற்கு வெளியே தினந்தோறும் ஒரு பெண்மணி நிற்கிறாள். திருமதி ரூஸ்வெல்ட் என்ன என்று வினவியபோது தனது மகன்கள் இருவர் இராணுவத்தில் பணிபுரிகின்றனர். அவர்களிடம் இருந்து கடந்த ஆறு மாதகாலமாக கடிதங்கள் எதுவும் வரவில்லை என்று கண்ணீர் விட்டு கதறுகிறாள். ரூஸ்வெல்ட் இராணுவ உயரதிகாரிகளை அழைத்து வினவியபோது தபால் பிரிக்கும் வேலைகளைவிட அதிமுக்கிய சண்டைப் பணிகள் இருக்கும் போது இதற்கு மேன்பவரை வீணடிக்க முடியாது என்கிறார்கள். இராணுவ வீரர்கள் உற்சாகமாக சண்டையிட வேண்டுமானால் அவர்கள் மனதளவில் உற்சாகமாக இருக்க வேண்டும். அதற்கு அவர்கள் குடும்பத்தாரோடு கடித தொடர்பில் இருத்தல் அவசியம் என்கிறார். அப்படின்னா அங்கே மில்லியன் கணக்கில் தேங்கிக் கிடக்கும் தபால்களை பிரித்து அனுப்ப நீங்களே ஆட்களை சொல்லுங்கள் என்கிறார் இராணுவ அதிகாரி விட்டேத்தியாய். அங்கே இருக்கும் மற்றொரு கருப்பின அதிகாரி அவர்களிடம் 6888 பற்றி கூறி அவர்கள் நிச்சயமாக வெற்றிகரமாக முடிப்பார்கள் என்கிறார். அதற்கு அந்த அதிகாரி கருப்பினப் படைப் பிரிவை பற்றிய குறைவான மதிப்பீட்டோடு வேண்டா வெறுப்பாக சம்மதிக்கிறார். சண்டைக்காக காத்திருந்த “6888“ பிரிவுக்கு இந்த Central Postal Directory Battalion, வேலை ஏமாற்றத்தை தந்தாலும் அந்த வேலையின் முக்கியத்துவத்தை உணர்ந்து உடனடியாக வேலைக்கு தயாராகிறார்கள். வேலை அமெரிக்காவில் இல்லை. ஆமாம் சண்டை நடப்பது ஐரோப்பாவில் தானே? இவர்களின் தபால் பிரிக்கும் வேலையும் அங்கே தான். இவர்களை குறைத்து மதிப்பிட்ட அந்த நிறவெறி பிடித்த இராணுவ அதிகாரி இவர்களுக்கு உதவி செய்வதற்கு பதிலாக பல ரூபங்களில் உபத்திரவம் தான் செய்கிறான். அவ்வளவையும் மீறி ஆறு மாதங்களில் செய்ய வேண்டிய மலையென தேங்கி கிடக்கும் தபால்களை பிரித்து அனுப்பும் பணியை மூன்றே மாதங்களில் வெற்றிகரமாக முடித்து அனைவரையும் வாய் பிளக்க வைக்கிறார்கள். இராணுவ வீரர்கள் வீட்டுடனான கடிதப் போக்குவரத்து மீளவும் கிட்டியதில் இவர்களை வணங்கி வாழ்த்துகிறார்கள். அந்த 6888 படைப்பிரிவின் இந்த மகத்தான சாதனை வரலாற்றில் எங்கேயும் அங்கீகரிக்கப் படவில்லை. இறுதியாக 2013 ல் தான் அந்த பிரிவினருக்கு அங்கீகாரம் வழங்கப் பட்டுள்ளது. லேனாவுக்கு ஆப்ராம் எழுதிய இறுதிக் கடிதம் அந்த மலைக்குவியலில் இருந்து லேனாவின் கைகளில் சேர்வது நெகிழ்ச்சியான ஒன்று. கேப்டன் சேரிட்டி ஆடம்ஸ்க்கும் கருப்பின வீரர்களுக்குமான உறவு மிகவும் சிறப்பாக சித்தரிக்கப் பட்டிருக்கும். இனவெறி அதிகாரி இவர்களது முகாமை பார்வையிட வரும் போது நடக்கும் உரையாடல் சிறப்பு. “நீ எவ்வளவு பெரிய அதிகாரியா இருந்தா என்ன இங்க நான் தான் கிங்கு“ என்பது போல கெத்தாக எதிர் கொள்வார் ஆடம்ஸ். நமது நாட்டில் ஒரு இஸ்லாமியர் மற்றவர்களைக் காட்டிலும் தமது தேச பக்தியை இரண்டு மடங்கு நிருபிக்க வேண்டி இருக்கும். ஒரு தலித் தனது திறமையையும் நேர்மையையும் மற்றவர்களைக் காட்டிலும் சிறப்பாக வெளிப்படுத்த வேண்டும். அது போல அங்கே அமெரிக்காவில் கருப்பினத்தவர் “எங்க கிட்டயும் திறமை இருக்கு, எங்களாலும் எந்த வேலையையும் உங்களைக் (வெள்ளையினத்தவரை) காட்டிலும் சிறப்பாக செய்ய முடியும் என்பதை நிருபித்தாக வேண்டும். தனது பட்டாலியனின் முதல் கூட்டத்திலேயே சேரிட்டி ஆடம்ஸ் இதனை தனது பெண்களுக்கு கறாராக கூறி புரிய வைக்கும் இடம் சிறப்பாக இருக்கும். உரையாடலும் அதை ஆடம்ஸ் ஆக நடித்த நடிகை கூறியிருந்த விதமும் அவரது உடல்மொழியும் ஆகச் சிறப்பாக இருக்கும். அனைத்து நாடுகளிலுமே ஒடுக்கப் படுவோரை நோக்கிய தவறான முன் அனுமானம் (prejudice)மற்றும் ஒதுக்கி வைக்க மேற்கொள்ளும் முயற்சி என ஒரே டெம்ப்ளேட்டில் தான் செயல்பாடுகள் நடைபெறுகின்றன என்பதை இந்த படத்தை பார்த்து உணர முடிந்தது. இந்த படம் நிச்சயமாக பார்க்க வேண்டிய படம். ஆர்வமுள்ளவர்கள் தவறவிடாதீர்கள் நெட்ஃபிளிக்ஸ் ல் உள்ளது.